Porjeto de Statutos de ALM

STATUTOS DE LA ALM

TÍTALO I

 NOME, DURAÇON I SEDE

Artigo 1º

(Nome i sigla)

L’Associaçon (deiqui palantre, ALM) adota l nome Associaçon de la Lhéngua i Cultura Mirandesa, i ye ua pessona coletiba de dreito pribado, sin fins de lucro.

Artigo 2º

(Duraçon)

La ALM custitui se por tiempo andeterminado.

Artigo 3º

(Sede i delegaçones)

1. La ALM ten sue sede na Casa de las Quatro Squinas, Rue de la Costanielha, an Miranda de l Douro, i poderá, por deliberaçon de l Juntouro Giral, criar delegaçones ou outros modos de representaçon que haia por buonos cunsante las sues atebidades.

2. La sede de la ALM ten l nome de Casa de la Lhéngua i Cultura Mirandesa.

TÍTALO II

REZON I ATREBUIÇONES

Artigo 3º

(Rezon)

La ALM ten por rezon:

a) pormober i sparbar la lhéngua mirandesa;

b) promober i sparbar l património cultural, stórico i natural de la Tierra de Miranda.

Artigo 4º

(Atrebuiçones)

Son atrebuiçones eissenciales de la ALM:

a) pormober l uso de la lhéngua mirandesa, falada i screbida, l sou ansino, zambolbimiento, studo i dibulgaçon;

b) pormober la defénsia, zambolbimiento, coincimiento i studo de la cultura mirandesa, an to las sues manifestaçones, cumo tal la música, la dança, la lhiteratura, l triato, antre outras;

c) stabelecer modos de colaboraçon cun outras anstituiçones, de la Tierra de Miranda ou de outros lhugares;

d) criar i mantener l Centro de Decumentaçon de la lhéngua i cultura mirandesa;

e) eiditar i apoiar eidiçones cunsante las sues atrebuiçones;

f) criar prémios cunsante las sues atrebuiçones;

g) acumpanhar i dar oupenion subre to las decisones que téngan a ber cula lhéngua i cultura mirandesa;

h) todo fazer pa que las pessonas deféndan la lhéngua i cultura mirandesa.

TÍTALO III

PRENCÍPIOS

Artigo 5º

(Prencípios)

La ALM ten cumo prencípios:

a) l’andependéncia, an relaçon a to l tipo de pessonas i anstituiçones, seia qual fur la sue natureza.

b) l respeito pula denidade de ls falantes de la lhéngua mirandesa.

c) la colaboraçon cun to las anstituiçones nesso anteressadas.

TÍTALO IV

DEBERES I DREITOS DE LS SÓCIOS

Artigo 6º

(Sócios)

1. Puoden ser sócios de la ALM to las pessonas, singulares ou coletibas, que cúmpran estes statutos.

2. Son cunsidrados sócios fundadores de la ALM:

a) ls sócios singulares que anterbéngan ne ato custitutibo de la ALM ou que béngan a ajuntar se a eilha anté dous meses apuis l juntouro custituinte;

b) ls sócios coletibos que s’ajúnten a eilha anté un anho apuis l’Juntouro custituinte.

3. L Juntouro Giral, por perpuosta de la Direçon, puode apreponer cumo sócios hounorairos aqueilhes que háian dado ua upa a la lhéngua i cultura mirandesa;

4. Ls sócios hounorairos nun stan oubrigados a pagar cotas.

5. Ls sócios coletibos ajúntan se a la ALM cunsante cunbén assinado antre la ALM i l sócio coletibo.

Artigo 7º

(Dreitos de ls sócios)

Son dreitos de ls sócios:

a) eiligir, ser eilegido, apreponer ou apreponer se pa qualquiera de ls uorganos sociales de la ALM;

b) partecipar i botar ne ls juntouros girales;

c) fazer perpuostas als uorganos sociales de la ALM;

d) tener çcuntos ou outras bantaiges an atebidades de la ALM;

e) ousar, ne ls termos a defenhir an rigulamento anterno, l Centro de Decumentaçon i outros serbícios prestados pula ALM.

Artigo 8º

(Deberes de ls sócios)

Ye deber de ls sócios cumprir estes statutos i defender la rezon i las atrebuiçones de la ALM, an special:

a) defender la lhéngua i la cultura mirandesa de todos ls modos possibles;

b) fazer por coincer la lhéngua mirandesa i sforçar se por l’ousar na fala i na scrita;

c) fazer por coincer la cultura mirandesa i partecipar nos atos que l dígan respeito;

d) partecipar nas atebidades de la ALM;

e) pagar las cotas stabelecidas.

 

TÍTALO V

 RECEITAS

Artigo 9º

(Receitas)

Son receitas de la ALM:

a) las cotas i outras pagas de ls sous sócios;

b) qualesquiera apoios ou pagas que l séian dados, ancluindo por bias de las sues eidiçones, de las taxas d’anscriçon ou outras aparecidas que reciba por bias de las sues atebidades;

c) las libaralidades de tenga l benefício;

d) qualesquiera outros rendimientos de bienes própios ou que le béngan a ser atrebuídos;

e) las cotizaçones de sócios beneméritos.

Artigo 10º

(Afetaçon)

Afuora ls ancargos de funcionamento, las receitas de la ALM son ambriadas pa cunseguir las sues atrebuiçones.

 

TÍTALO VI

 UORGANOS DE LA ALM

DEBISON I

GENERALIDADES

Artigo 11º

(Uorganos)

1. Son uorganos de la ALM: l Juntouro Giral, la Direçon, l Cunseilho Friscal.

2. Ls nembros de ls uorganos son eilegidos por trés anhos.

3. Por perpuosta de la Direçon, l Juntouro Giral puode criar ls modos de ourganizaçon que cunsidre a la própia para cunseguir oujetibos specíficos.

 DEBISON II

JUNTOURO GIRAL

Artigo 12º

(Cumposiçon i reuniones)

1. De l Juntouro Giral fázen parte to ls sócios que cúmpran ls sous deberes.

2. L Juntouro Giral ye deregido por ua mesa custituída por maioral, bice maioral i dous secretairos.

3. L Juntouro Giral ye chamado a ajuntar se por carta eiletrónica, mandada pul sou maioral al menos uito dies antes pa l correio de cada sócio, cul die, la hora, l sítio de la reunion i de ls assuntos a tratar.

4. L Juntouro Giral nun puode deliberar an purmeira cumbocaçon, sin que stéian persentes al menos la metade de ls sous sócios, podendo deliberar, ua hora apuis, cun qualquiera númaro de perséncias.

5. L Juntouro Giral ajunta se, ourdinariamente, ua beç por anho i, stroudinariamente, siempre que chamado ajuntar se pul sou maioral por pedido de la Direçon ou de l dieç por ciento de ls sócios.

Artigo 13º

(Cumpeténcia)

Cumpite le al Juntouro Giral, an special:

a) eilegir i botar fuora ls nembros de ls uorganos;

b) decidir la culidade de sócio hounorário;

c) aporbar las atebidades i l ourçamiento para cada anho;

d) çcutir i aporbar l relatório, l baláncio i las cuontas de l eisercício, cun parecer de l Cunseilho Friscal;

e) deliberar subre la modeficaçon de ls statutos, l’aporbaçon de l rigulamiento giral anterno i sues modeficaçones;

f) fixar ls balores de la perpinha d’antrada i de la cota a pagar puls sócios an cada anho, por perpuosta de la Direçon;

g) outorizar la Direçon a mercar bienes de raiç;

h) aprobar ou cunfirmar la pertenéncia de la ALM a outros ourganismos;

i) decidir ou dar parecer, por sue einiciatiba ou a pedido de la Direçon, subre qualesquiera questones amportantes pa la bida de la ALM;

j) eilegir l maioral hounorairo de la ALM, sien funciones eisecutibas.

Artigo 14º

(Deliberaçones)

1. Las deliberaçones son tomadas por maiorie de botos de ls sócios persentes.

2. Las deliberaçones subre modeficaçones de ls statutos eisígen l boto faborable de trés quartos de l númaro de sócios persentes i nunca menos de la metade de to ls sócios.

3. La deliberaçon subre l findamiento de la ALM eisige l boto faborable de trés quartos de l númaro de to ls sócios que cúmpran ls sous deberes.

4. Ne ls juntouros girales, un sócio puode fazer se repersentar por outro sócio por bias de carta mandada al Maioral de la Mesa i antregue anté l ampeço de l juntouro.

DEBISON III

 DIREÇON

Artigo 15º

(Cumposiçon)

1. La Direçon ye cumpuosta por siete nembros: un maioral, dous bice maiorales i quadro bogales.

2. An causo de bagatura de lhugar, la direçon scuolhe, antre ls sócios cun to ls dreitos, l nembro ou nembros an falta, debendo ser cunfirmados ne l Juntouro Giral que se faga a seguir.

Artigo 16º

(Cumpeténcia)

1. Cumpite le a la Direçon gerir la ALM i, an special:

a) repersentar la ALM an juízo ou fuora del;

b) requerir la cumbocaçon de l Juntouro Giral;

c) apresentar al Juntouro Giral las atebidades i l ourçamiento para cada anho;

d) apresentar al Juntouro Giral un relatório, l baláncio i las cuontas de anho;

e) aporbar l’antrada de nuobos sócios;

f) aprobar ls rigulamientos de funcionamiento anterno que séian neçairos al zambulbimiento de atebidades specíficas de la ALM;

g) zambulber todas las atuaçones neçairas pa l bun funcionamiento de la ALM;

h) criar grupos de trabalho pa l zambolbimiento d’atebidades cunsante las sues atrebuiçones.

2. La ALM oubriga se pulas assinaturas cunjuntas de dous nembros de la Direçon, sendo un deilhes l maioral ou un de ls bice maiorales.

Artigo 17º

(Deliberaçones)

1. La Direçon reúne quando fur cumbocada pul sou maioral.

2. La Direçon reúne balidamente cula perséncia de quatro de ls sous nembros, çque debidamente cumbocada.

3. La Direçon delibera por maiorie de botos de ls nembros persentes, tenendo l maioral, alhá de l sou boto, dreito a boto de culidade an caso d’ampate.

DEBISON IV

 CUNSEILHO FRISCAL

Artigo 18º

(Cumposiçon)

L Cunseilho Friscal ye cumpuosto por trés nembros, un maioral, un secretairo i un bogal.

Artigo 19º

(Cumpeténcia)

Cumpite le al Cunseilho Friscal an special:

a) acumpanhar i cuntrolar la geston financeira de la ALM;

b) dar parecer subre l plano d’atebidades i l ourçamiento de la ALM;

c) dar parecer subre l relatório i cuontas de la ALM;

d) dar parecer subre questones financeiras i todo l que ambuolba çpesas amportantes, siempre que esso le seia pedido por qualquiera outro uorgano de la ALM.

 

TÍTALO VII

FINDAMIENTO

Artigo 20º

(Rezones de findamiento)

La ALM finda pulas rezones prebistas na lei, ne ls termos destes statutos.

Artigo 21º

(Bienes)

Findando la ALM, l que sobrar de ls sous bienes será antregue a associaçones cun atrebuiçones eiquibalientes.

 TÍTALO VIII

ÇPOSIÇONES FINALES

Artigo 22º

(Lhéngua de ls statutos)

Ls statutos de la ALM stan screbidos an mirandés i son acumpanhados de ua berson an pertués.