An Zenízio deziemos fraga, tamien se diç peinha nas tierras de Miranda

Esta fraga (peinha), talbeç la maiorie que la bai ber eiqui, nun le diç nada, tamien naide als bai a craticar por esso, tenerá solo para eilhes l segneficado dun guapo retrato que tirei nua dessas caminadas que fago pul termo de Zenìzio quando stou de bacances, desta beç até andaba cumigo tie Natália, i percurabamos alacraus.

Era un die de berano, pul rechino de la tarde, l sol calcie que nien braseiro de cepos.

Quando passemos pul "Barrocal", ende saquei de la máquina de retratos i dixe pa la mie tie, mira  eiqui esta la fraga, agarrada a eilha hai muitas cuontas, i muitas deilhas stan agarradas al culo.

 Era eiqui que quando an dies cumo este, de la fin de berano, andabamos de buieiros que faziemos las nuossas brincadeiras, scorregando por eilha abaixo assientados nua piedra ou galhos de touça. Quantas las bezes se rumpien las calças i apuis teniemos que aturar la nuossa mai.

Outros tiempos, ls que faziemos esso teneran arrrimado a seis dezenas d'anhos, mais cousa menos cousa, mas la maiorie agora yá nun ándan cula calças rotas ne l culo, digo you, ls que ándan nun ye por bias de las brincadeiras que eilhes yá ténen tino i juizo, ls que ándan ye por bias de la troika, qu'essa fizo muita giente scorregar, nun pulas fragas, mas si pulas nacessidades.

Outras eras que nun éran buonas, mas éran puras i nós ls buieiros teniemos perdon por todo, nas nuossas benas corrie la sangre de la jubentude i ne ls nuossos coraçones ferbie ua bida lhibre, a la par de ls paixaricos que fui l que sobrou para fazer cumpanhie a la fraga afamada de l Barrocal 

(Barrocal ye un chamadeiro de l termo de Zenízio)