28/11/12

Tiempo de pensar (refleçon)



 Eileiçones n’Associaçon Cultural i Recreatiba Nial de la Boubielha (ACRNB)

Deiqui a poucos dies, ou seia ne ls percípios de l més de febreiro/2013, ne l die 10 a quando la fiesta de Nuossa Senhora de las Candeias, tamien conhecida puls Zenízienses cumo l “Dous de Febreiro” que stá a ser purparada pula Direcion de l’Associaçon cumo ten acuntecido ne ls redadeiros anhos, las associadas i associados ban a botos.

Ua acion statutaira i oubrigatória, puis somos ua Associaçon registrada (la purmeira que fizo ls sous statutos an mirandés), cun uorganos eileitos, statutos, ourganizada, lhougo este ato ye oubrigatório. Esta acion bai a tener lhugar nua assemblé pa l efeito, cumo termínan ls statutos, puis ls atuales uorganos, fíndan l mandato que recebírun de las(s) sues (sous) associadas(os).

Agora stamos an tiempo pré-eileitoral,de refleçon, tal qual dixo l comunicado de la direcion, i publicado ne l site www.nialdelaboubielha.org .  Assi sendo quier-se que las associadas i ls associados séian partecipatibos, que todos tomén cunséncia que ye un deber partecipar na bida de l’Associaçon, criando listas, apuntando eilemientos ou renovando ls que yá eisisten, eileger ls sous uorganos ye ua cundiçon reglamentar.

A miu ber, i cumo esto só se fai de trés an trés anhos, custa pouco, al que se quier ye que todos fágan un sfuorço i al menos nesse die participen n’assemblé i bóten.

Sou solamente un associado cumo ls demais que ajúdan ne ls magostos, ne ls eibentos de l jogos i cumbíbios, na realizaçon de la fiesta de Nuossa Senhora de las Candeias, mas dou eiqui l miu teçtemunho de que an cuncéncia todos debemos participar, dar la nuossa oupenion, botar, l’Associaçon ye ua causa de todos nós, yá mos dou tantas alegries, fizo cun que to l mundo que stá andrento deilha sentisse proua, trouxo até nós, cultura, çporto, associativismo, lhéngua, cursos, palestras, salimientos de lhibros, tradiçones, questumes, amizade, merece que siempre que percisa tenga l nuosso acunchego.

Siempre i todas las oupeniones fúrun lhebadas an cuonta por estes i ls redadeiras uorganos eileitos, por amor a la causa associatiba eilhes trabalhórun i purparórun ls eibentos, ounindo las nuossas gientes d’acá culas que stan n’aldé, ye de lhoubar i ye de reconhecer esse don que siempre tubírun para guiar ls çtinos de l’Associaçon.

Se naide quejir outra cousa, al menos bamos todos angrandecer l trabalho que fazírun até hoije i cula nuossa perséncia renobar ls botos de bun trabalho i de cunfiança.

1 comentário:

leonardo antao disse...

Buonas nuites associados de l Nial de la Boubielha,

Gustei deste apelo de Faustino a todos ls associados de la Associaçon CR Nial de la Boubielha, “que todos tomén cunséncia que ye un deber partecipar na bida de l’Associaçon, criando listas, apuntando eilemientos ou renovando ls que yá eisisten”.

Cumo bien screbiu Faustino:
- “l’Associaçon ye ua causa de todos nós, yá mos dou tantas alegries, fizo cun que to l mundo que stá andrento deilha sentisse proua, trouxo até nós, cultura, çporto, associatebismo, lhéngua, cursos, palhestras, salimientos de lhibros, tradiçones, questumes, amisade, merece que siempre que percisa tenga l nuosso acunchego”.
- “Siempre todas las oupeniones fúrun lhebadas an cuonta por estes i ls radadeiras uorganos eileitos, por amor la la causa associatiba eilhes trabalhórun i purparórun ls eibentos, ounindo las nuossas gientes d’acá culas que stan m’aldé, ye de lhoubar i ye de recoincer esse don que siempre tubírun para guiar ls çtinos de l’Associaçon”.

Tenéis cuncéncia de que l’Associaçon debe renobar l sou Persidente de la Direçon, por outro, cun nuobas eideias i sangre nuobo, que puoda cuntinuar i aperfeiçoar este porjeto i poner-lo mai alto.
You stou na Direçon hai demasiado tiempo, hai mais de 18 anhos, (antre 1 de Nobembre de 1994 i Febreiro de 2000, cumo Persidente de la Comisson de la Boubilha, i depuis de l'ouficializaçon, i de las purmeiras eileiçones pa la Associaçon, zde Febreiro de 2000 até hoije, cumo Persidente de la Direçon).

Por ua Associaçon mais fuorte, ounida i siempre birada pa ls zeios ls associados sclareço que coloco l lhugar de Persidente de la Direçon a la çposiçon de ls associados, porque nun pretendo recandidatar-me, a nun ser que nun apareça naide para esse lhugar.

Un abraço
Leonardo