Este sangre

Este sangre que cuorre nas benas de la mie tierra, ne ls Outonhos, nun se zbota. Hai burmeilhos i amarielhos barro an carbalhos i an cereijeiras, amarielhos d´ouro an choupos, berdes spargidos an manchas de nabales i coubales.

Miro pa las fuolhas abanadas pul aire friu que nun repente chegou i beio-le sprito de lhuita para se assiguráren a la teta de sue mai, regísten i, an pequeinhos meneios ansáian l bolo que ls há-de lhebar al chano, para apuis an cama dóndia çcansáren ne l Eimbierno, acocando ls rocos que siempre médran adonde hai stierco de fuolhas.

Miro pal termo i ls uolhos scápan-se-me. Oubo ls suspiros de ls páixaros registentes bolando altos i an bandos ,para stáren mais longe de la gelada que yá abraçou la tierra dóndia, molhada i beisada por auga desiada i cun esses marmúrios, l miu sentido scapa-se atrás, ambuolto an cheiros de doce de temato i balancia que no pote férben.

Miro pa ls caiatos que gémen, zafiando l ásparo de las piedras, tal i qual cumo las fuolhas, a sigurá-se a la bida andeble, registindo a mais un cair de fuolha, un cachico mais fuortes que las fuolhas sbolaciantes; i hán-de registir a mais un Eimbierno cun la sprança de la berbonta que le há-de nacer an mais ua Primabera. Trítan ls caiatos, tente nun caias a caminho de la missa, pedidos crentes de salbaçon de la alma, remisson i mea culpa de ls pecados. Miro para eilhes i beio que se dróban pul tiempo anque aquestumados a tiempo anfernoso.

Miro pal mundo que me ben d´ andrento l cumputadori beio-lo bien mais negro, fumarento, sfamiado. Aténtio la fuorça i dou-me de counta que ls uossos stálhan menos i cun eilhes porparo la tierra para que cun las fabas l miu mundo seia mais farto.

Este sangre que cuorre nas benas de la mie tierra fai-me correr mais sangre nas mies benas, mais burmeilho ,d´ua eimoglobina biba,de tanto oucigénio bolar nas bochadas deste Praino.