Cumbíbio-L magosto de l'Associaçon C.R. Nial de la Boubielha 2012

 Tal qual la Direcion de l’Associaçon anformou na sue redadeira comunicaçon i ne l site publicada, als associados, cunterráneos i amigos, l tradecional magosto acunteciu, arrimado a las 14 horas de la tarde de deimingo (4 de Nobembre) muitos Zenízienses i sous familiares ajuntórun-se ne l terreiro (merendeiro) de las fiestas, na Quinta da Marialva – Corroios.

Este eibento, l magosto, fui l purmeiro na bida de l’Associaçon i durante muito tiempo l mais partecipado, l que mais giente ajuntaba, aquel que la nuossa quemunidade Zeniziense a bibir an Lisboua i alredores mais deseaba que chegasse, i tenie alguas rezones de ser assi.

-Porque era ne l die de “Todos os Santos”, un die de muita nomeada, un die lhigado a las tradiçones, i todos nós ne l que toca a rebibir tradiçones éramos i inda somos muito apegados.

-Porque era feriado nacional, l que permitie que quedássemos çponibles para sastisfazer l deseio de quemer uns belhós, assando las castanhas i fazer desse cachico ua fiesta.

-Porque siempre adonde fumos criados la maiorie de nós, se fizo magostos, se quemiu castanhas durante muito tiempo i por to ls lhados, bonda dezir que neste ajuntouros todos nós relhembramos, para alhá doutras cousas, las cuontas i abinturas de ls seranos an família, alredror de la chamineias.

 Agora, por decison de la direcion i buntade de muitos associados, yá nun se fai l die de “Todos os Santos” mas si ne l deimingo apuis, tamien yá nun se fai ne l lhocal que hai trinta i siete anhos datrás se fazie, tamien yá nun s’ajunta tanta giente cumo s’ajuntaba ne ls purmeiros anhos, mas l que ye berdade ye que ls que s’ajúntan fázen-lo siempre cul sprito de cumbibir i de relhembrar las tradiçones.

 Al lhargo de todos este anhos, muitas cousas demudórun, todos l sabemos, ls tempos son outros i até l lhocal adonde se fazírun ls purmeiros, yá nun ten, nien se puode assar castanhas, nun se puode fazer lhume.

  L que amporta, i que ye dino de dezir ye que l cumbíbio, l magosto de l’Associaçon Cultural i Recreatiba Nial de la Boubielha (ACRNB), que ampeçou hai trinta i siete anhos cuntina bibo, cuntina a ser ua rialidade, cun mais giente ou menos giente, las pessonas que fázen parte de ls uorganos de direcion nun se poupórun an trabalho i dedicaçon para que este die tan amportante i de tanto segneficado nun se muorra.
  L que amporta i ye amportante ye que ls associados ténen la possiblidade de s’ajuntar, cumbibir, falar, trocar oupeniones, dar i recebir amboras de l’aldé, de ls parientes, de ls bezinos, de ls amigos i de quemer uns belhós i molhar las gorjas cua pinga. Permitir que haba cumbíbio, que haba comunicaçon culs nuossos cunterráneos i amigos, porque pa la maiorie nun fusse assi, doutro modo nun tenien tiempo, la zinreira de la bida lhiebamos todo, nun hai bagar para nada, l tiempo sfumasse dun jeito que lhebamos ls dies a fugir dun lhado pa l outro.

 Estes cumbíbios siempre fúrun i cuntínan a ser cachicos d’ouro, ls que alhá stubírun nun stubírun solos, cun eilhes stan siempre ua mimória de l tiempo dantes, cun eilhes stan momientos bibos dua anfáncia, dua bibéncia de bezinos, dua stória, dua tradiçon.

Eirrado serie nun ls fazer, serie cortar cun toda ua stória de la nuossa Associaçon, serie cortar la possiblidade  de refazermos ls nuossos questumes, serie pribar muitos de nós d’atamar las saludades que tenemos daqueilhes que bíben loinge, daqueilhes que gustamos d’ancuntrar, de falar.

 Pul que beio, i stou siempre listo cun todos, naide sal deilhes anfadado, de mala cara, naide dá l tiempo por perdido, bien alrobés.

 Stan de parabienes ls de la direcion, ls que assórun las castanhas i to l mundo que alhá stubo. La junta de freguesie de Corroios merece de la parte de todos l reconhecimento por çponiblizar l spácio i la buona gana de star persente cun dous eilemientos.

Outros eibentos l’Associaçon ne l próssimo anho bai pormober, stá yá bien acerca l “Dous de Febreiro” tamien conhecido pula Fiesta de Nuossa Senhora de las Candeias, todos eilhes ténen siempre cumo oujetibo, l’ounion de todos ls Zenizienses, que haba un sprito de cumbibéncia i amizade berdadeira por muitos anhos.