La ronda de ls castielhos

Onte cheguei a Sendin para passar uns dies, inda nun sei até quando. Nesta altura stou a trabalhar nun porjeto de cuonta a ser eiditada pula Delgaçon de l Norte de l Menistério de la Cultura i que stá a ser eilustrada por Sara Cangueiro, uma pimpona rapaza, artista, culas sues raízes an Sendin i an Bempuosta. Para melhor antender la tierra de Miranda fui-me cun eilha, i mais pessonas, a dar ua buolta pula Tierra de Miranda, que ye l centro de la cuonta, yá que esta ampeça nun sítio que muita giente conhece i se chama Peinha Campana, mesmo na marra antre ls cunceilhos de Miranda i de Mogadouro. Nessa buolta fumos a fazer la ronda de ls castielhos, mas nun tubimos tiempos de fazer todos ls castielhos de la tierra de Miranda: Algoso, Outeiro, Penas Roias, Miranda i Mogadouro, esto solo para falar de ls que mais s'aguántan de pies. Quiero dezir-bos que fui un passeio i tanto.

Salimos de Sendin a caras a Atanor, yá a meia tarde, eiqui admirando sue guapa beia, mas passando an zlhado para Teixeira, adonde dá pena ber lhougo a l'antrada la scuola cun dues sala, mas nien un garotico se bei por alhá. Dá choro ber muita casa yá sbarrulhadas naquel cabeço amponiente subre l Angueira. Abeixemos pula nuoba strada cun ua lhebe paraige para meter an retrato dous guapos palumbares que hai a salida, bien restourados. Atrabessemos la ribeira de Tortulhas mesmo adonde bai a zambocar ne l Angueira i seguimos a camino de Mora, lhembrabdo l dito Uba, Mora i Fuonte Lhadron trés lhugares éran i trés lhugares son. La tarde rechina cumo sartian chena de azeite i por aqueilhas arribas de l Angueira las xaras parécen pantasmas que scolhírun bibir ne l einfierno. An Uba fui oubrigatória la paraige para retratar l mais amportante cunjunto de palumbares que conheço i tamien lhembremos la nuossa amiga Bina que eiqui fui criada cun sue bó.

Paraige a sério fui mais alantre adonde la strada torna a atrabessar l Angueira, que fazírun ua presa nun sítio adonde l riu ye tan galano que cumbida a quedar. Paremos i antretenimos-mos a retratar i arrincar juncos de caiata, ls baiuncos de que yá falei neste blog i que eilhi stában bien criados i cumpridos. Daba-mos la gana de quedar, mas l camino inda era lhargo i alhá tornemos al camino para Bal de Algoso, que até parecie ua aldé cun muita giente, mas que ten bien assinalada la casa de turismo rural que eiqui fazírun hai uns anhos. Lhougo apuis, agarremos la strada que bai de Bumioso para Mogadouro i que, a la bista de las stradas que habiemos andado, até parece ua outostrada. L próssimo oubjetibo era Algoso, antiga bila cun sou guapo pelourinho i casa de la cámara, agora museu, mas nun paremos que a la punta de la lhadeira mos asperaba la fortaleza, bielho castielho roqueiro custruido puls frailes houspitalários, que eilhi tenien sede de la sue Comenda. Sinte-se al redror l oulor a mouras ancantadas, que inda aparécen an manhanas de San Juan a agarrar l'ourbalheira i an ciertas nuites cántan cumo serenas a atrair a la faia que s'atira pa l Angueira dua altura de mais de duzientos metros. Bien frimei ls oubidos, mas nun las oubi, i tanta gana que tenie de le oubir la cantiga. Staba cerrada la puorta de la bielha fortaleza i alhá mos botemos lhadeira abaixo até la nuoba i amponiente puonte subre l Angueira, i era la terceira beç que atrabessábamos esta ribeira agora sien auga que cuorra. Eiqui ye oubrigatória nuoba paraige i quaije scachar l cachaço a mirar pa l'amponéncia daquel castielho que custa a antender cumo serie possible cunquistá-lo a nun ser a la fame i a la sede, armas que muita giente ousou al lhargo de ls tiempo i que inda hoije usa. Sinte-se l peso de la stória, tan fuorte que smaga. Hai que andar, que stória nun anda camino antes mos lhieba para caminos de mimórias sien fin.

Agora, yá an tierras de l cunceilho de Mogadouro, la chubida ye mais lhebe i l'oulibeira bai-se tornando cada beç mais spessa i l recorte de ls montes algo mais suable, nun hourizonte sien fin, mesmo quando alantre se pon la lunjura de las sierras de Bornes, de Nogueira, de Reboredo. Passamos l'ancruzelhada de Balcerto, i falemos desta tierra adonde se ampuso l purmeiro rancho de Pauliteiras i seguimos pa las tierras cun Peso ne l nome (San Martino, Macedo i Peso) até Penas Roias. Paremos un cacho na barraige de la ribeira cul mesmo nome i que abastece Mogadouro de auga, i admiremos la guapa zona de lazer que alhá hai - pena que stubira sien naide -, cumo a ganhar fuorças até al castielho, un sbarrulho inda amponiente. Atrabessemos l'aldé i chubimos até arriba. Ende fui tiempo de lhembrar cuontas de ls Templários, corridas pula prainada de giente cun miedo i eisércitos que naide habie chamado i siempre segnificában fame i muorte. Ampeçaba a correr ua fresca que fazie piel de pita i daba gana de jiqueta. Demos la buolta a aqueilhas piedras burmeilhas (roias) i alhá cuntinemos. An beç de seguir pa l Azinhoso i inda sentir D. Nuno Álvares pereira a rezar a la Senhora de l Carrasco, la hora acunselhaba mais a seguir por trás la sierra de la Castanheira passando pula Belariça, Ougariç, Tó, Lhamoso. Apuis Bempuosta, que era l nuosso çtino i adonde ua cena de trás de l'oureilha, an ca de ls nuossos amigos Antonho Cangueiro i Manuela, mos trouxo outra beç al mundo de las cousas simples i neçairas, apuis de tanto habermos çarandado por seclos de stória, corrido alantre i atrás de eisércitos, amborrachado ls uolhos cun tanta cousa, que hai que saber ber para se gustar. I, passa-se cumigo, quanto mais se bei mais se gusta.

Eiqui queda este lhargo relato a modo zafio. Se podirdes, nun déixedes de fazer la cumpleta buolta de ls castielhos de la Tierra de Miranda. Se you podir i me quejirdes, até me oufereço para bos ls amostrar, pena que l tiempo seia tan cúrtio.

Çculpai tanta palabra, mas ls dedos botórun-se-me a correr puls botones de l cumputador i nun staba a ber meia de ls agarrar.