Rio de Infinitos/ Riu d'Anfenitos

Lançamento do Livro “ Rio de Infinitos/Riu D’Anfinitos”

Sáb 09/09 - 14:30 (na sede da Junta de Freguesia). Comissão de Festas da Nossa Senhora das Graças - LAGOAÇA

Preça d´anfenitos

Ye la baranda de grades de la quelor de l tiempo

que me lhieba an brebe anleio i arrecelo d'entardecer.

Ye na baranda suolta ne l çcampado de l mirar

que m´astribo i m´antronco n´arble adonde me fiç.

Ye l toque na parreira de piel retesada

i resgada que me diç de l manantial que sentie

i de las scaleiras que chubie i abaixaba,

querendo antender-me ne l eimaranhado de la bida.

Era an preça d'anfenitos que la baranda se spraiaba.

I you, debruçada, a sentir-me nada, nun cabie an mi.

I you, nun suolo d'anquietudes a agigantar-me

pa las dúbedas que nunca resolbi.

Arrimada a ti,

parecie que l'aldé al loinge era eigual a la mie,

anque la raia mos falasse d'outra lhéngua

i d'outro paíç. Na mie baranda percebie la raia

i çcunfiaba que nien la binha, nien l'aldé q'abistaba,

tapában l rebolhiço de l riu

que bien fondo scababa l fragaredo.

Nien you nien l riu coinciemos lhemites

i indas que l aperto i l'anquietude,

saltábamos i corríemos

na priessa dun tiempo a çcubrir.

Teresa Almeida Subtil