18/11/14




Amadeu Ferreira, ten scrito Crónicas cul Títalo “CRÓNICAS DE BIBIR” i todas las semanas son publicadas ne l Jornal Nordeste, na FUOLHA MIRANDESA.


Cula sue outorizaçon, bou las a dibulgar, ua ó dues pur semana, mas nunca antes de la puplicacion ne l Jornal.


Crónicas de Bibir [1]

Apedura Hoije

"L títalo desta crónica ye l modo cumo you traduzo an mirandés la afamada spreson de l grande poeta lhatino Hourácio, CARPE DIEM i que l nuosso poeta João de Deus tan bien dixo cun l berso “A vida é o dia de hoije”.

De berdade outra bida nun tenemos que esta, ne l sfergante que cuorre. Assi i todo muita beç deixamos que l tiempo passado mos smague ou acendemos todas las nuossas lhuzes para un feturo ancierto que inda nun eisite, mas solo ye ua catadorie de l tiempo, esse ente que nunca saberemos l que ye i siempre mos há de tener an stranha relaçon cun el.

L berso de Hourácio nun sonará bien als dies dua pessona que biba mal, seia por malinas, seia eiquenomicamente, mas esse nun ye l sou sentido. Este ancosta-se al bibir que tenemos seia el qual fur, ua tomada de cuncéncia de la sola bida que podemos bibir, la que hoije i agora tenemos a la mano."

Amadeu Ferreira (18Fev14)

1 comentário:

leonardo antao disse...

Buonas nuites amigo António Cangueiro,

Admiro Amadeu Ferreira cumo home que bibe la bida al serbício de la lhéngua mirandesa i de ls mirandeses!

Mas çculpe-me la mie çcordáncia cul cuntenido desta crónica! Se nun houbisse outra bida para alhá desta, la bida serie ua brincadeira cruel i ua tremenda anjustiça para quien heiroicamente bibir la bida a fazer bien, cumo l fazirun Madre Teresa de Calcutá, Francisco de Assis, João Paulo II,...

A estes tengo la certeza qu'un grande AMOR ls spera, cun to la grandeza, la beleza i la ciéncia de l mundo.

Un arrochado abraço,
Leonardo