CAMINAMOS

Caminamos antre las palabras i a l'hora de l antardecer, a l'hora de l lhusque fusque hai un camino cheno de miedos, ye cierto, mas tamien de  melodie.

Amanhécen - mos bersos i aqueilha poesie cun quelores tan calientes que mos fai  bibir.

Bede l çponer de l sol! Ten un fuogo tan fuorte i tan guapo que sabemos que tornará soutordie para calcer las flores sin eidade.

Caminamos antre las palabras i, cumo se fusse arqueologie, garimpamos las que ténen sonido i sentido i çponemos-las a la lhuç de l die.

La fala de l praino, la lhéngua mirandesa, ben d´antanho, de l scanho, de las cuontas de l'abó a la lhuç de la candeia. L´abó cuntaba i la meia crecie, punto por punto.  Inda tenemos la cestica chena de nobelos de las cuontas que l'abó cuntaba al lhume. Nun habie tiempo a perder  i inda tenemos ls ócalos de punta de nariç, mercados na feira, cun baraços i abraços antrelhaçados.

Inda que you nun tenga nacido eiqui,  ye l coraçon que me lhieba i, por isso, quiero falar i cantar esta lhéngua, cantar las modas de las sementeiras, de las mondas, de las cegadas, de las parbas i de ls filadeiros. Aqueilhas que falan de namorar i las mais guapas - las d'ambalar.

" cúl ró ró pego ne l nino cúl ró ró se bai drumindo." i assi caminamos pul regaço de ls anhos que mos dan guarida.

Cantemo-las i beilemo-las, sentindo-las, por esse mundo afuora. Por mi, nun quiero ir-me ambora sin deixar scritas alguas palabras, aquielhas cun que bordo l miu camino, cada beç mais prainica. Neilhas sou arble, riu, flor i abe de las arribas. Uas ténen oulor a urze, a tomielho, a fenolho ó mesmo a hourtelana de la ribeira.

Caminamos antardecendo mas l'eidade ye aqueilha que sentimos i mos achega a l'alegrie de la bida. Nas cousas pequeinhas hai milagres, si, porque ser filha, mai i abó todo a la ua ten un ancanto tan berdadeiro cumo se l sol, mesmo al çponer, rumpisse drento de mi.

Caminamos a la squinica de la bida cun la calor i l amor, amor de dar  i recebir.

Ye berdade que gustamos de ls chinelos, de l borralho i dun pouco mais d'acunchego, mas tamien calçamos alperagatas i bamos por ende.

Caminamos  inda cun buntade de  daprender. Classes al aire, lhibres cumo pardales i beilamos cun alma de rapazas eiqui i eilhi, adonde calhar.

Las angúrrias son stradas sulcadas de carino, son doçura de tantas risadas oufrecer als nietos.

Ye eimenso l mundo de ls afetos. I assi, quando ampeçamos a perder l'oubido, parece que gritamos i cantamos cula fuorça cun q'amamos.

 

Teresa Almeida