Zarranchados

Zarranchados, nun son yá poucos! (Rancho – quemido)

Hoube ua beç un tiu (andaba metido na política) que dixo, quien stá almuorça, quien nun stá passa por baixo de la mesa, que ye l mesmo que dezir que nun almuorça.

You bibo ne ls alredores de Lisboua, de la capital de l nuosso paíç, dito deste modo até s’asparece que ye cousa buona, que stou cheno de proua, puis digo-bos-lo cun toda la mie houmildade, nun sinto proua nanhua, yá senti, tiempos hoube que bibir acerca de la capital até me fazie sentir bien.

Mas agora nó, porque nun puodo ougulhar-me de bibir adonde an cada rue, squina, praça, ne ls jardins, scaleiras de casas, ambaixo de las puontes, alquedutos de las stradas, de ls camboios, ancuostas ou lhadeiras solo se bei personas a bibir na probreza, cun fame, friu, abandonados de la sociadade, por esta sociadade andenheirada, que dinheiro hai-lo, mas stá mal çtribuido, personas para quien ls gobernates nun gobérnan.

Son ls zarranchados desta capital que you tenie cumo l centro de decison dun paiç, para que la justícia, l’eigualdade, la fraternidade fusse ua realidade.

Que stamos a fazer, que proua podemos tener, quando giente de to las eidades, zde bielhos i bielhas que tubírun ua bida chena de sacrafícios i nun ténen que quemer, que trabalhórun até que puodien, giente de meia eidade que nun ténen adonde ganhar l sou sustento i de ls sous, moços i moças que acában la sue formaçon nas scuolas i ounibersidades i nun ténen adonde sponer la sue sabedorie i poner l sou conhecimiento al serbício de l sou paíç, ninos i ninas filhos de famílias adonde nien pai nien mai ténen trabalho?

Bibir a pie de la capital (puis cuido que ye la cidade de l miu paíç que ten mais zbalidos) nun me inche de proua, deixa-me acabrunhado. You sei que la probreza i la miséria yá se tornou ua cotra de quaije to l território, mas quier-me parecer que la deiqui se torna mais vergonhosa, porque cumbibe cun las classes mais repunsables por haber tanta probreza, cumbibe cul pomposo i luxo, culas mais çprezibles seinhas de ganáncia.

Duol-me muito passar nua rue adonde las montras de çapatos, de bestir, d’ouro, de bancos feitos cul que de mais rico eisiste i ber pessonas adonde la sue cama ye un carton, las sous pertences cáben nua sacola, l sou quemer será aqueilho que las eiquipas de “bien fazer” traziren.

Un die, nós homes i mulhieres d’agora seremos julgados, mas nun speremos por ua bençon se cuntinar esta çcreminaçon, este anfierno.

Zarranchados, son cada beç mais.