Stá ne ls redadeiros dies la posseblidade de
besitar ua de las posiçones que mais me marcou cumo mirandés, falo de la
sposiçon “"Bózio de las
raízes" de Alcina Pires (Zenízio) que stá na Casa da Cultura - “Miranda de l
Douro” – i ten l die 30 d’agosto, cumo sendo l redadeiro.
Para mi i cuido para muitos mirandeses de l miu tiempo, tengo sessenta i
quatro anhos d’eidade, besitar esta sposiçon, fui rebibir un cachico de la mie
bida, mas tamien cuido que nun s’acaba eiqui nien na mie geraçon l balor
temático que cada quadro ouferece, tamien las geraçones mais nuobas i las
gientes d’outros lhugares ancúntran balores de sobra para enriquecer l sou
ouniberso cultura, porque ye splicatiba dun tiempo an que la sue outora pinta
cun toda la sue fedlidade.
Todos ls quadro teçtemúnhan, assi you l antendi, un cacho de stória, ua
cuonta, i solo tenie que rendir-me i dezir a la mie cunterránea i amiga,
oubrigado Alcina, que stou bencido por toda la dedicaçon i amor que botes-te,
por me dares la posseblidade, atrabeç deilhes tornar a bibir, tornar l miu tiempo
an que bibi nessa mesma tierra que tu tan bien pintas.
Anquanto por ende andube (i l tiempo nun fui muito) besitei-la dues
bezes, an cada quadro ancuntraba-me a mi mesmo, ls mius i l miu pobo, las
lhidas que se fazien (que agora yá nun se fázen) que fazírun l miu ouniberso
familiar, que marcórun l miu spácio cumo giente de l praino, l miu carátele, l
que era dantes ua region que percisa de que se cunte l que fui para saber para
adonde bai.
Yá tenie la certeza, siempre que besitei las tues outras sposiçones, mas
esta ye cumo ua cunfirmaçon, sós sien dúbedas nanhuas a la par de muita giente,
i que l fázen doutros modos ua grande ambaixadora de la cultura mirandesa, you
sei que nun ye fácele, mas estes tous eilustres trabalhos merecien fazer ua
jornada por outros lhugares.
Mais ua beç parabienes, trabalhes-te muito, stá todo mui guapo, solo
tenes que tener muita proua, porque l que fazes stá bien feito, you i que cuido
que todos tenemos muito ourgulho de tener assi ua cunterránea
2 comentários:
Caro Amigo Faustino,
You tamien tube la possebilidade de ir admirar essa sposiçon i gustei muito. Serie ampossible dezir l cuntrairo yá que me sinto ancapaç de zenhar tan bien i cun tal perfeiçon.
Este anho, ende an Pertual, bi muitas sposiçones i obras por bezes até de grandes pintores (ne l Museu de l Chiado i na Gulbenkian por eisemplo) mas quedo cuntento por saber que las tierras de Miranda tamien ténen sous artistas, mui anspirados i cun grandes capacidades artísticas. Essa buossa cunterránea ye um deilhes. Deseamos-lhe muita salude para cuntinar a mostrar-nos cachicos buonos de grandes testemunhos de bida.
Un abraço para bós i la buossa tie.
Ana Maria Fernandes
... quedo cuntentA...
Enviar um comentário