16/12/18

L persepe n’Eigreija



 La nuite staba scura i frie.

 Nun fusse la smorecida lhuç de las bumbilhas de la rua i l branco eimaculado de la niebe q'habie caiído nessa tarde, i naide s’astrebirie a botar un pie fuora de casa.
 La mai natureza habie bestido de branco cun nebon todo l que staba fuora de teilha, mas mientres, las farrapicas de niebe deixórun de caier cumo se quejisse fazer la puonte para soutordie, i tamien eilha associar-se, dar ua upa para la realizaçon de ls deseios.

 Podie assi mirar pa ls telhados, las ramalhadas, ls uolmos i las bordas de l ribeiro amouchado i sereno cumo quien cumbida a drumir a quedar quieto.

 Mas quieto ye que you nun staba, la cena habie sido farta i demorada, i you nun bie modos de chegar l’hora de mos botar a camino, até que mai m’abotonou la jiqueta i m’acunchegou l gorro até las oureilhas, staba mais que cierto que l tiempo de spera habie acabado, pai abriu la puorta de la rua.

 Agora yá staba todo tan acerca, agora só faltaba bencir l camino que me lhebarie até l Sagrado para que todo acabasse.

 Ls ferbores, las áncias q’habien tomado cuonta de mi ne ls redadeiros dies para ber l persepe que staba n’Eigreija Matriç, habien chegado a la fin.

 Fui só poner ls pies nas trabas de l soalho,  i cumo s’alguien m’habisse ampurrado deixei la mano de pai, q'habie agarrado to l camino i scapei-me. Por antre las piernas de muitos que lo arrodiában, furei até quedar eili, bien acerca, chegába-le se quejisse,  até le podie tocar culs dedos de las mies manos. Ls mius uolhos abrien-se agora de spanto i sastisfaçon, i l de mais de mi quedou parado delantre daquel quadro de ternura q'ambolbie la Sagrada Família i todas aqueilhas criaturicas que lo cumponien.

 L fuorte siléncio q'habie naquel spácio i l clareio de  lhuç de la streilha puosta alhá ne l alto de la lhadeira, la cabanha adonde l Nino staba deitado nuas palhicas, cun sue Mai i Pai, la baquita, l burrico, i las canhonas pacendo, l carreiro por adonde ls Reis Magos chegórun, era todo tan guapo i mágico que nun mais íba a squecir.

 Guardei siempre cumigo este momiento de cumtemplaçon, tan bien cumo ls mais baliosos i amportantes regalos que tube.

A la fin, quien puode dezir q’algue hai mais amportante que la besita al persepe na nuite de cunsuada, na nuite de la missa de l galho na tierra de mius abós.


1 comentário:

Existe Sempre Um Lugar disse...

Desejo-lhe um Natal cheio de bênção e alegria. Feliz Natal!
AG