Para quei percurar ancuntrar culpas, adonde nun las
hai.
El até era feliç, porque tenie todo, era dua família
probe, mas farta, acumparando cun muitas de l sou tiempo, a alguns cumpanheiros de
scuola, alguns de l mesmo anho, alguns que morában na mesma rua.
Nun le faltaba nadica que fusse, na mesa i ne l caixon staba
siempre la fogaça i un prato cun chica. Fogaça feita por sue
mai ne l forno, puis por bias de l muito
consumo de l pastor i l buieiro, sue mais cozie ua fornada por semana. L prato
cula chicha gorda que habie sido tempero na cozedura de l caldo, nien siempre l
persento, l salpicon éran persença, até nien nas casas ricas, porque esses manjares solo marcában persença
na mesa an dies de fiesta ou nomeada, assi cumo ls gisados de bacalhau que el i
sous armanos torciemos l nariç, dando buoltas i mais buolta anté que sou pai
disse por eilha.
Chamában-lo
biqueiro, mas para nun l ber lhebantar de la mesa cun fame, le dezien para s’agarrar
a la cicha. Porque chica cun pan, a esso nunca le fizo fastiu,
era quanta benisse.
I desses guisados de bacalhau que de garoto torcie l
nariç, mais tarde, na bida de melitar se lhembrou muito, quando ne l rancho de
l quartel era arroç cun frajones i frajones cun arroç, que saludades de ls
guisados que nun gustaba feitos por sue mai, mas yá era tarde.
Las polbeiras secas mercadas an Alcanhiças, quando
tiradas de l pote fomegando cumo fumegában ls çufinos de la bacas an dies de
friu, cozidas cun patatas chegában a la mesa era un de ls maiores cunsuolos que
tenie, gustaba-le quemer polbo.
An garoto siempre gustei de quemer, mas tamien qual ye l garoto que nun
gusta?
