Un nabiu de piratas nabegaba ne l mar Índico adonde fai
muita calma habie meses d’afilo sien s’arrimar a tierra firme.
Ls marujos, porque l’auga doce se tenie acabado habie muito
tiempo, nun se lhabában nien mudában de bestes, por todo esso l nabiu yá fedie!
L capitan mandou parar l nabiu i chamou l “eimediato”(segundo
capitan):
-Senhor Mascarenhas, l nabiu fiede, mande ls homes trocar de
bestes!
Respundiu l eimediato:
-Si, si senhor….
Bota-se a reunir ls marujos i diç:
-Marujos, l senhor capitan stá de bentas por bias de l feder
que hai ne l nabiu i manda que todos troquem las bestes.
Antonho troca la camisa cun Jermias, Plinio troca las calças
cun Juan … i assi teneis que l fazer todos.
Quando todos yá tenien feito las trocas, tornou l falar cul
capitan i diç:
-Senhor, todos yá trocórun de bestes.
L capitan, mais alibiado,
dá la orde de cuntinar la biaige pur esse mar afuora.
Moral de la
cuonta:
-Nun ye la política que fai l candidato birar fala-barato,
léria, lérias, troca tintas, antrujon, ye l boto de l pobo.
3 comentários:
Puls bistos, Faustino, l que quejistes dezir ye que fui eileito un nuobo persidente de la república mas que ls problemas ban a cuntinuar a eixistir i naide quaije que seia capaç de ls resuolber...
You nun serei tan negatiba, prefiro ser mais otimista ...
Purmeiro porque hai que respeitar todos ls que fúrun botar i ua maiorie antre nós que scolhiu logo a purmeira buolta Rebelo de Sousa. I digo esto sabendo i sien tener miedo de l dezir que mesmo assi nun fui este l candidato an uien you botei. Mas la democracie ye assi, tenemos que aceitar l que la maiorie scolhiu, sien denegrir eisageradamente ou até desnecessariamente. Yá ye ua buona cousa que puodamos botar depuis de tantos anhos an que esso nun fui possible an Pertual. Nunca hai que squecer esso.
I a mi l que me dá sprança ye l facto de habermos tido la possebilidade mesmo assi de poder mudar de presidente. You staba a la spera dessa mudança i pul que beio, este nuobo persidente ten outro stilo, ye mais moderno i, penso nun m'anganhar, ten mais cultura, l que ye mui amportante ne ls dies de hoje.
A ber de agora palantre aqueilho de l que el bai a ser mesmo capaç. Talbeç até mos surprenda i speremos bien que seia ne l bun sentido. Paciéncia anton i até cunfiança antes de começar a criticar. Nun bal la pena. Inda ye mui cedo.
Ana Maria Fernandes
Buonos dies amiga Ana
-Que buono tener siempre ls buossos comentairos.
-Son riqíssemos i apútan an direciones ciertas.
Quando scribo l mais de la bezes nun son acuontra naide, son perduto de las bibéncias de l die a die, sien que la rezon seia ua solo i birados para l'ouféncia de quien quier que seia. Tengo respeito por todas las oupeniones, sien perder la mie, i quando dou la mie nun l fago para que ls outros póngan la sue zlhado.
Oubrigado, screbi siempre.
Que la buossa bida i de ls buossos baia siempre pul melhor son ls mius deseios
Un beisico
FAntão
Adonde stá screbido riqíssemos i apútan debie sat riquíssemos i apúntan
Enviar um comentário