Luito

La quemunidade Zeníziense stá de lhuito

Muorriu-se tiu Américo João, que yá algun tiempo staba doliente i bárias bezes spitalizado ne l spital de Bergáncia

Home que cuntaba parriba de uitenta anhos, stimado i conhecido cumo naide n'aldé i alrredores, pul trabalho i arte de carpinteiro, cunselheiro de meio mundo, percurado por giente que benie de loinge para cun el festejar, cumbibir i daprender la arte de star dá bien cun todos i las cousas de la bida. Zenízio perde muita giente to ls anhos, naide ye sustituido, mas hai alguas perdas mais sentidas. Se hai personas que deixórun teçtemunho, marcos, mimória an todos nós tiu Américo fui un deilhes. Quanto queda por dezir, mas mius caros amigos la fuorça de l'eimoçon que me bai n'alma stá-me angaranhindo ls dedos. 

I la quemunidade Zeníziense stá mais ua beç de lhuito, inda nun habie squiera uito dies esta família habie perdido Isabel filha de tiu Américo i de tie Sebastiana.

Son horas de muita delor para toda la quemunidade quando perde ls sous, para todas las filhas, filho, gienros, nuora, nietos i nietas i para toda la família que stá lhigada por ounion i lhaços d'amizade ls sentidos pésames

La quemunidade sparbada pul mundo stá cun bós, i eiqui queremos deixar estas palabricas cun sentido d'ounion i que Dius tenga sues almas na sue cumpanhie que nós oufeceremos las nuossas ouraçones i l nuosso coraçon para que l lhugar deilhes nunca quede baziu,

Fuorça, muita fuorça para bencir estas horas tristes, cun fé, muita fé que eilhes son nuossos mas sue alma stá an çcanso i paç