Gosto de lhobos

Cuido que yá me cunfessei mais bezes. 

Mesmo assi nun me canso de l dezir, i se nun stubisse ancerrado antre quatro paredes a pie de l computador até boziaba bien alto cumo sembas de bezes l fiç quando andaba pul *Cabeço de l Relhuzedo, *Malhada de l Naso, *Cabanha, *Ourrieta Cuba, la *Gaga, *Pandon i muitos mais.

Por esse animales guichos, guapos, anteligentes, de quatro patas capazes de bater lheugas i lheugas de termo, d’uolhos lhancentos, d’oureilhas spetadas i guichas, sou capaç de boziar bien alto até que las gorjas me duólan, que nun podemos deixar queilhes zaparéçan para siempre que tenemos que eibitar la sue stinçon .

I mirai bós que you fui pastor, i nun fui un die, fui ua bida, quando naci yá an mie casa habie ganado i fui atrás del al chin chin de mie mai que me criei, you até m’astrebie a dezir que naci nua cabanha. 

Anton era causo para dezir que habie de ls oudiar, porque ls lhobos son ls einemigos de ls pastores? 

Al lhargo de las muitas dezenas danhos que tubimos ganado, l verdadeiro sustento de la mie família, eilhes roubórun canhonas i cordeiros que mos fazien falta i éran l nuosso sustento, mas nien mesmo assi sou capaç de les querer mal, a esses animales de quatro patas, selbaiges, que son parte de la natureza, que l mais de las bezes solo mátan para quemer (mesmo que an alguas temporadas eilhes fágan muitos stragos) nun sou capaç de ls oudiar. Quando hoije yá bielho trago al de riba alguas alhembráncias de l miu tiempo de pastor, sinto delor de ls males que se le fazien, de nun antendermos este animales.

I ye causo para dezir quanto mais conheço de la bida, mais gusto de ls lhobos, eilhes roubában, róuban i matában por anstinto para bibir cumo spécie, son listos, ourganizados i bíben an sociadade, mas you quanto mais conheço de la mie, mais perdono ls lhobos. Mais digo, desta sociadade que ten alguns houmanos, que se pórtan cumo lhobos, ou pior, só que estes son de dues patas, nun sou capaç de fazer nada para que nun zaparéçan, que la sue spécie deixe de eisistir, que la sue stinçon seia l mais debrebe possible, nun sou capaç de fazer un solo géstio para bien de l sou feturo.

Serie mui malo haber un mundo manhana, i nós nun teneriemos l perdon de las geraçones feturas, se deixarmos zaparcer ls lhobos (de quatro patas) essa spécie selbaige que ten l’amenaça de stinçon, será mui malo se habir un mundo manhana, i nós nun teneremos l perdon se nun stinguirmos estes lhobos (de dues patas).

*(chamadeiros de l termo de Zenízio)