La tradiçon de la matáncia de l cochino an Zenízio

La mie associaçon “Sol Nascente”, puis tamien sou associado zde la purmeira hora, ambora nun deia muitas upas, cousa que to las associaçones percísan, puis yá staba a bibir fuora de Zenízio quando fui criada, i solo tenga cuntato cun eilha durante las poucas bezes que alhá bou, bai pormober l eibento de la “Matáncia de l cochino” astanho ne l die 23 deste més, de dezembre l més de l Natal.

Nun quedarie da bien cumigo se nun falasse eiqui deste eibento, porque sei que a este sítio bénen ler muitos cunterránios i amigos, muitos que cumo you stan fuora, mas quien sabe se sabendo deste cumbíbio nun dan ua amanhadela na sue bida i se bótan até alhá! I mesmo até amigos, puis nunca ls Zenízienses cerrórun la puorta a naide, muito menos l íban a fazer nun die destes, que se fai ne l terreiro de l salon de l’Associaçon (de l pobo) a cielo abierto.

Ye a cielo abierto que se bota l cochino ne l talho, se chamuçca, se raspa i lhaba, se parte a las postas i s’assa ne l burrolho de l assador. Se bos dir jeito nun steiades cun bergonha, nien bos acanheis, achegai-bos i botai uns muordos até nun querer mais.

L que cunta nestes momientos ye l’alegrie de tener cumpanhie, de star culs familiares parientes i amigos, cumbibir, reforçar ls lhaços d’amizade, cuontar uas lhonas, rebibir las tradiçones, ls questumes, la fala mirandesa, traier al de riba las nuossas lhembráncias.

Nun hai nada mais balioso, nien nada que le deia mais sastisfaçon als Zenízienses que star culs amigos i quando ye a pie dua buona febra i ua pinga, anton  muito melhor.

Parabienes a bós, persidente, direçon de la “Associaçon Sol Nascente” i todos ls associados por mantener biba esta tradiçon, por pormober estes eibentos que ajúntan ls Zenízienses.

 Para ber mais retratos de limpassado este ye l link

http://www.facebook.com/media/set/?set=a.490158554361083.111302.100001008281658&type=3