Mirar para nun morrer

Yá conhecie “L remanse de Pedro Soldado”, de Manuel Alegre, que siempre muito me eimocionou, mas inda nó essa nuoba publicaçon de l mesmo outor, Nambuangongo meu amor – os poemas da guerra, pula Dom Quixote. Oubrigado, anton, Amigo Abelhón, por mos dar essas amboras a nós tamien que stamos a mais de 1000 quilómetros desse país que ye cunsidrado, tamien debe de saber, un pobo de poetas i de poetas líricos... Subretodo que, a mais de 1000 quilómetros por cunseguinte, nun ye an qualquiera librarie que ye fácele ancuntrar outores de lhéngua pertuesa mesmo cuntemporáneos cumo ye l caso de Manuel Alegre (i de lhéngua mirandesa, nien se fala!); ye por esso que ye tan amportante, para nós tamien, benir aqui a ber na Anternete para ancuntrar tamien buona lhiteratura!
Todas estas eibocaçones de suldados nuossos cunterráneos que perdírun la bida durante la guerra quelonial son mui tristes, ye berdade Abelhón, mas tamien ye eissencial para cada cidadano, cada un de nós, lhembrar anquanto inda ye possible la mimória i tamien l cuntributo de cada un deilhes, quaije todos forçados que fúrun a ir a cumbater an África...

Mas you, sabe, Abelhón, nun puodo aceitar la eideia que téngamos que l fazer “sien mirar a mas nada que l nome” cumo diç... Se assi fusse, todo serie mui fácele mas nada, nada, neste caso ye fácele precisamente!

Muito se poderie dezir i you solo tengo la sperança que cada un assi i todo assuma la sue anteira repunsabilidade: delantre la stória i tamien la houmanidade.
Será eisagerado fazer até alguas cumparaçones?

Quantos suldados pertueses, por eisemplo, fúrun sacraficados para l goberno salazarista tentar amponer pula força l sou domínio nas quelónias pertuesas? Alguns cientos de miles i yá era demais!

Mas quantos, quantos... nun solo cientenas de miles!... mas si melhones de africanos de todos ls territórios ambaixo l domínio pertués (sien squecer todos ls outros quelonizados tamien puls spanholes, angleses, franceses, houlandeses, etc...) fúrun deportados, al lhargo de mais de quatro seclos (i nun solo durante uns binte, trinta ou quarenta anhos!) an nabius negreiros pa ls lhebar pula fuorça a trabalhar cumo scrabos, eilhes i ls filhos deilhes, toda la bida, por eisemplo ne l Brasil, durante bárias giraçones ?
16 melhones, só para l Brasil precisamente, segundo stimatibas, antre ls quales menos de la metade teneran subrebibido a la biage andentro de barcos cun cundiçones que éran, cumo se sabe, purfeitamente zoumanas.

Puis you, Abelhón, si quiero mirar, lhembrar i tomar toda essa realidade tamien an cunta para tentar cumprender quales las rezones que fazírun cun que esses doze rapazes nuobos, por eisemplo, que pula cierta tamien falában Mirandés cumo stamos nós a fazer agora, nunca mais tornórun bibos para todas essas aldés, ourrietas i prainadas de las tierras de Miranda que nós inda hoije conhecemos tan bien....
Porque ye que todo esso acunteciu ?
Talbeç la pregunta nun seia assi tan andecente i se la fago ye precisamente porque solo tengo miedo que alguien me diga: Puis acunteciu porque tamien houbo quien nun quejisse que todos esses suldados fússen capazes de mirar... precisamente, capazes de mirar... !

I para mos ajudar a antender cumo muitas cousas se passórun, acho que nun será demais amostrar aqui, para eisemplo, estas dues eimaiges que talbeç yá muitos cunhéçan, dambas a dues de l pintor i zenhador francés Jean-Baptiste Debret (Paris, 18 de Abril de 1768— Paris, 28 de Junho de 1848), outor de “Voyage Pittoresque et Historique au Brésil" (Biaige pitoresca i stórica al Brasil) que fui eiditada pula primeira beç an Paris an 1831, depuis de Debret haber passado quinze anhos nessa quelónia pertuesa de la América de l Sul que se iba a tornar andependiente yá an 1822 i adonde lansinou i se tornou un de ls fundadores ne l Riu de Janeiro de la “Academia Imperial de Belas Artes”

N.B. Son estas eimages que eibócan la scrabatura ne l Brasil que decidi poner aqui. Yá cheguei a ir un die até esse país i ne ls anhos uitenta tamien se me lhembra dua sposiçon cunsagrada a esse pintor que fui Jean-Baptiste Debret que se morriu, cumo podeis ber, faç agora 160 anhos.
Mas an Angola, nunca alhá stube cuntrairamente a outros... Desse país, antretanto, las eimages fuortes que guardo i que eibócan - mais inda: denuncían sien ningun stado d'alma! - l racismo i nuobas formas de scrabidon que cunheciu l pobo angolano inda ne l seclo XX por parte de ls Pertueses (Yá nós éramos bibos!) son testos: remanses de José Luandino Vieira, por eisemplo, que fúrun traduzidos para francés por un de ls mius porsores na Faculdade. Mas tamien para eibocar l drama de la guerra quelonial, ye berdade, poemas mui amportantes screbidos por Manuel Alegre cumo esse “Remanse de Pedro Suldado”...

Todos esses Mirandeses nuossos cunterráneos que se morrírun inda na frol de la eidade cumo suldados, nesses anhos negros que fúrun ls anhos 60 i inda ne l ampeço de ls anhos 70 nas antigas quelónias de África, Amigo Abelhón, éran todos, acho que desso podemos tener la certeza, outros tantos Pedros suldados cumo ne l poema de Manuel Alegre:

Soldado número tal
só a morte é que foi dele.
Jaz morto. Ponto final.
O nome morreu com ele.