Miedo de ser artista
Marie si
tubo arreceios daqueilha
máquina que l tiu rializador
traíe al ombro.
I todo se passou inda nun hai muitos
anhos.
Mas antes de
bos cuntar la cuonta toda deixai que bos diga, l que uns nun le gusta, outros
i outras deseian de cuorpo, coraçon i alma.
Porque l que
nun falta porende ye giente que se znuda de l cachaço als pies, amostrando l
que agora ten i nun tenie, se cumpon que nien spantalho an sementeira de
nabina, se rebolca an todo
l que ye sítio, se mete
ambaixo i an riba para
ser artista de cinema.
Marie nun staba nien bien nien mal
bestida, staba cumo siempre, cumo las demás pastoras quando guárdan sous ganados. Xal, lhenço que l’ancubrie la cabeça para
atamar l reciu benido de l aire
que assopraba de ls lhados de la raia seca i la ruoca de filar.
L ganado
pacie eili na fundura de ls
Chanos, termo stribado al
Cabeço de l Naso nas marras de l
termo de Zenízio cul de la Pruoba, ls perros stiraçados ne l chano fazien
cumpanha a la pastora, cumo siempre, bien acerquita de la strada de
Samartino.
Sien s’aporcatar parou ua carrinha bielha
toda sgatafunhada – que le damos hoije l nome “Pão de Forma” – na strada i bota-se un tiu a caras a eilha c’ua máquina de filmar más outro c’un grabador agarrado por un filo a un scuitador, a
ua moca que más s’asparecie a ua maçaroca.
Marie, que habie mandado calhar ls perros
que tamien stranhórun toda aqueilha abordaige, nun stubo cun meimeios.
-Parai, parai ende bien loinge de mi que
you nun quiero essas cousas cumigo, you nun quiero que saqueis retratos. Podeis
retratar l ganado, canhona a cahona, ls perros que yá se calhóran mas la buona
de la Marie nun l’agarrais ende nesse apareilho…
L rializador
que yá alguns meses andaba cul camarada puls termos i lhugares de la raia, praino
mirandés i Castilha/Leon, bien ateimou q’aqueilho nun fazie mal ningun.
Dezindo-le:
- Solo
quiero fazer uns pequeinhos relatos i decumentairos para registrar pal feturo.
De pessonas que ténen afazeres cumo esta de pastora, que fálen la fala d’acá, l
mirandés, saber quales son ls buossos questumes. Ídes a quedar pa la Stória i las nuobas
geraçones quédan a saber cumo era dantes. Cuntar atrabeç de l cinema porque ye
que tantas pessonas d’eiqui se fúran, se scapórun “a salto”, pa la Spanha i
Fráncia.
Mesmo assi Marie
nun quijo. Nun se cumbenciu.
Dezindo:
- Mesmo
assi nun quiero retratos.
Nun precisaba
de ser lhebada an retatos pul mundo. Nun querie ser coincida nien recoincida,
nun querie ser mirada nien xaldrocada por naide.
- You acá
me bou gobernando i tocando la bida palantre culas upas de l miu tiu, de pastora sien lomeada. Podeis tener buonas
antençones, mas nunca fiando.
Faustino Antão
Sem comentários:
Enviar um comentário