Crónica

Dou l nome de crónica a esta reçma de perguntas, mas nun ye la “Crónica de ls Buonos Malandros” cumo screbiu nun lhibro l eilustre cronista Mário Zambujal. 

Mas si porque me chegou la gana de zabafar.

Sou hai alguns anhos, por bias d’ajudar un nieto, un home de la cidade de Lisboua, por ende passo uns buns cachos durante la semana. I por ende biaijo, ando l mais de las bezes a modos de bagamundo i s’hai ua cousa que ls bagamundos fázen bien ye mirar, oulhar, arreparar nas obras i matutar an muitas cousas, seian buonas ou malas. 
 

-Porque se fázen?

-Se son necairas?

-Qual l’outelidade?

-Se nun se podien fazer outras, ambriar l denheiro i l sfuorço aonde fusse melhor para todos, sien zbirtuar ls cumpormissos i porjetos? 

I ben a perpósito l que l retrato que publico arriba amostra.

Sítio bien coincido, afamado puis ye acerca dun Património Nacional, que se bei atrás de la floresta de fierro. Sítio que ye tamien carton de bejita pa pertueses i  strangueiros que bénen a la capital.