La bida na biaije de l suonho. Antre
lheitura i regaço agarra se te l suonho. Ancarreira se te para adonde
nun lo deixas seguir anquanto spierto te mantenes. L celebro que mos
quemanda, pensar mos nós que lo quemandamos, ancamina mos para adonde
nun queremos. Que fuorça essa amigo, quaije me faç cantarolar la cantiga
de Sérgio Godinho, tanta la fuorça de lhigar i zlhigar ls filamientos
que quemandan l camino de nuosso pensar, - sinapses -. Spiertos puode nun se deixar zbiar,
l pensar, a drumir i an suonho lhieba mos para adonde nun lo sabemos i, ls caminos pur adonde anda mui arressaiados son que splicar nun lo sabemos.
Ne l sofá de la garaige, drumes a suonhar: assentado a la banca de sapateiro...talbeç?...la mie, l almuorço purparara... ua nina pequerrica a la puorta se dibertie, la strada eilhe acerca passaba…l peligro spreitaba.
La mie nina más nuoba eilhi staba i cumpanhie mos fazie. Tamien un home que nada fazie, nun sei, l pai de la
nina? Achega se l'hora d'almuorço, l home i la nina quemer nun
quejíran. Quemiamos las berduras i de la trabiessa, çpenica l
home ls berdes que alhá subrórun. Mui oucupado ando you, nun pára de tocar l
telemoble, outro númaro para l miu tenie sido zbiado,
jornalistas a me pergantar cousas que you nun sei respunder. Spierto
subressaltado i nun me gusta l suonho. Nun lo cunsigo splicar, mas
d'algun modo lo antendo…
1 comentário:
Buonas nuites Antonho Cangueiro,
La lheitura de testos cumo este dan-me fuorça para cuntinar a sonhar cula lhéngua mirandesa.
A drumir l suonho lhiebamos para adonde nun sabemos, mas sabemos que mos lhieba a pensar la bida. Para fazemos de la nuossa bida ua stória feliç, ye ó nun amportante pensarmos bien la bida i bibir ua bida bien pensada?
Un abraço
Leonardo
Enviar um comentário