À! Bacielho, À! Bacielho
Nun t´ancontrei, sou sacana
Mesmo assi you stou feliç
Pul dares l cielo a Ana.
Tamien te digo a ti Ana
Que passei por Atenor
I por mais que buscasse
Nun ancuntrei l tal amor.
Nun sei se staba alhá
Nun te zminto a ti.
L que you quiero dezier
Ye que you nun l bi.
Quando por eilhi stube
Se you l tengo ancuntrado
Nun haberie necessidade
De l percurar noutro lhado.
Depuis inda you ancuntrei,
Esse tan falado amor
Mas para tu saberes
Nun fui an Atenor.
Eilhi botei l barro a la parede
Mas nun sei que se passou
Decierto you nun fiç bien
Porque el nun s´agarrou.
Cielo, ancuntrei alguas bezes
Mesmo sien star l bacielho
Mas sien saber porquei
Depuis perdiu-se-le l brilho.
Agora nun sei adonde stan
Nien l cielo, nien l amor
Talbeç un die destes
Tenga you, que ir Atenor.
Haber s´ancontro algun cielo
Que noutros tiempos nun bi
Talbeç aba alhá algun bacielho
Que te subrasse a ti.
José António Esteves
Diç, Amigo Jesé Esteves, que nun l ancuntrou l bacielho... ou l Bacielho (cun maiúscula), esse sacana ...
ResponderEliminarMas a mi parece-me que si, que si l ancuntrou, i até bárias bezes, porque cumo yá mos dixo (i até mos lo dixo an bersos !) ye pai i tamien abó. I talbeç seia esso l berdadeiro cielo que mos ajuda a ancuntrar siempre algun brilho para cuntinar a bibir !
Porque ye berdade que nien todo ye fácele...
Cunta mie mai que you tenie poucos meses quando andou a ajudar a plantar ua binha nuossa (La purmeira mas que fui preciso plantar) i lhebaba-me cun eilha para esse sítio de l termo de Sendin chamado l Boubielho culas arribas mesmo alhi a la borda... I cunhecendo mie mai...
Debe pula cierta de haber plantado mais dun bacielho
Nua binha que queda nun sítio chamado l Boubielho
Mas porque uns áchan que l termo ye cousa de bielho
Stá decidido, este anho, para essa binha de l Boubielho
Tamien essa tal, que balie bien mais que un anielho
I adonde you cun poucos meses yá miraba l cielo...
Que deixe para siempre de mos mostrar l sou brilho !
Muitas felcidades para bós Amigo Jesé Esteves, cumo para toda la buossa família.
Buonas nuoites Ana, l amor si ancuntrei alguas bezes, mas l que you querie dezier era que nun fui an Atenor, nien staba l bacielho por perto, mas staban outras cousas, i las cousas furan-se fazendo.
ResponderEliminarAgora eiqui l que conta ye la pandega, tenenmos que dezier cousas sérias mesmo a brincar.
Beisicos i muita salude para ti i ls tous que Dius bos acumpanhe
José António Esteves
Assi i todo, bai star melhor assi esse miu poema...
ResponderEliminarDebe mie mai pula cierta
de haber plantado
mais dun bacielho
nua binha a que dan l nome
de Boubielho
Mas porque uns áchan
decíden i decrétan
que l termo
yá ye cousa de bielho
acabemos por aceitar,
tamien nós, este anho,
para essa binha,
essa tal
que balie bien mais
que un anielho
i adonde you
cun poucos meses
yá miraba l cielo...
que deixe para siempre
de mostrar l sou brilho… !
Buonas nuites.
Mas nó! Inda queda melhor assi anque mui ligeiramente modeficado)...
ResponderEliminarDebe mie mai pula cierta
de haber plantado
mais dun bacielho
nua binha a que dan l nome
de Boubielho
Mas porque uns áchan
decíden i decrétan
que l termo
yá ye cousa de bielho
acabemos tamien nós,
por aceitar, este anho,
para essa binha,
essa tal
que balie bien mais
que un anielho
i adonde you
cun poucos meses
yá miraba l cielo...
que deixe para siempre
de mostrar l sou brilho… ?
Buonos dies !