LS ANHOS DE JANTONHO
Toda la stória ampeçou
Fai sessenta i cinco anhos atrás
Que ne l lhugar de Palaçuolo
Adonde naciu l rapaç
Las culpas las tubírun
La tie Ana i l tiu Chico
Pus nua nuite d´amores
Fazírun este chuchico.
Naci nun doze de Márcio
Qu´era la feira an Sendin
Que me habien cumprado na feira
A mie me dezierón assi(n).
Dues armanas yá tenien murrido
Naquel momento perciso
Fiquei cun Mariana i Oulibia
Cun Angrácia i cun Nacisio
L rapazico alhá se criou
Pa l bien ó pa l mal
Pul meio d´alguns trambulhones
Cumo ye natural
Passou todo tan a priessa
Que you nien dei por isso
Lhougo mie mai se muorrie
Apanhando nabiças no chapiço.
Fui un choque mui grande
Mas la bida nun parou
La ruoda seguiu rodando
Anté que la mie s´ancrabou.
Muitos anhos mais alantre
Muorrie-se tamien miu pai
You inda por eiqui stou
A ber l que la bida me fai
Hoije stou eiqui ne l lar
Depuis de muitos anganhos
Junto culs mius belhicos
Festejando ls mius sessenta i cinco anhos.
José António Esteves
Tiu Jantonho,
ResponderEliminarpurmeiro parabines, sigundo quien fai bersos assi ten que ter parabines a drobar.
Bós poeta sois i bersos guapos fazeis que para l anho que ben mos presenteis cun outros tantos ou mais.
Este comentário foi removido pelo autor.
ResponderEliminarBuonas nuites,
ResponderEliminarAbraço arrochado de parabienes; que fágades muito i nós que ls cóntemos!
D'hoije nun anho!
Alfredo
Caro amigo
ResponderEliminarSalude i un grande abraço de parabienes. Que d'hoije nun anho.
Amadeu
Buonos dies a todos
ResponderEliminarHei-de fazer ls que me deixaren
Que you inda nun stou cansado
E pe la buossa amablidade
Muito mas muito oubrigado.
Abraços
J.A.Esteves
PARABIENES cun un abraço Tiu Jantonho,i d'hoije nun anho que cuorra pul mesmo canho.
ResponderEliminarBien haiades i fuorça i muita anspiraçon para screbirdes muitos bersos.
Buonas nuites tiu Jesé Antonho,
ResponderEliminarCuntai muitos, siempre cun salude.
Gustei mui deste buosso poema i para esta lhéngua arribar bamos a seguir cula scrita sien mos squermos de la falar.
Un arrochado abraço,
Leonardo
Buonos dies Jesé Antonho,
ResponderEliminarParabienes inda que seian un cachico atrasados. Parabienes tamien por tan guapos bersos. Amigo Jesé Antonho la colheita de 47 ye de las buonas i por isso sodes l home baliente i un de ls grandes oubreiros de la poesie mirandesa.
Un abraço arrochado i buona Páscoa,
Francisco Domingues
Buonos dies Jesé Antonho,
ResponderEliminarParabienes inda que seian un cachico atrasados. Parabienes tamien por tan guapos bersos. Amigo Jesé Antonho la colheita de 47 ye de las buonas i por isso sodes l home baliente i un de ls grandes oubreiros de la poesie mirandesa.
Un abraço arrochado i buona Páscoa,
Francisco Domingues
Buonos Dies para todos.
ResponderEliminarAnibersariar ye ua amostra
De ouportunidades para aprender
Que mos lhembra custantemente
L tiempo que mos falta biber.
Abraços.
J.A.Esteves