18/04/10

Serei Primabera



Entra-me an casa l oulor l jasmin
A ancarrapitar pula laranjeira an flores albas
Entra-me an casa l oulor las glicínias
Que tápan la parede acerca las malbas.
Entra-me la Primabera na alma
Atrabeç dua centeilha de sol que se antremete
Por antre las nubres que anteiman an quedar
I arráman chubia para lhágrimas lhabar.
Quiero lhabar-me nessa chúbia de Abril
Borrascos caídos a la priessa, augas mil
Cun perfumes ambuoltos de mil flores.
Áh Primabera, hei-de guardar-te
A siete chabes drento de l miu peito!
Ah oulores frescos de la mie quimera
Fazei-me sentir siempre Primabera!
Há-de chegar l Eimbierno friu i branco
Adonde azimbrarei ls uossos a doler pranto
I naqueilha ansanidade i quimera
Hei-de sintá-me arrimada al miu bércio
I tenerei la Primabera...
Ne l miu peito...






2 comentários:

leonardo antao disse...

Buona nuite Adelaide,

Este tou poema a la Primabera flui cun ua simplicidade de rala beleza, anspirada an fatos de la natureza.

Mui antressante este tou cachico de l poema "Fazei-me sentir siempre Primabera! ... I tenarei la Primabera... Ne l miu peito...".

Tengo berificado ne ls tous einúmaros poemas i testos, i nas dues aulas de Formaçon de Formadores que Amadeu mos dou, que nun te cuntentas cula mesmice de l die-la-die, i que buscas ua bida chena de seneficado, cumo se fusses siempre ua Primabera ua guapa donzeilha.

Parabienes pul guapo poema i, nun squeças, “ne l miu peito”, serás siempre essa Primabera, esssa guapa donzeilha.

Un abraço,
Leonardo

Adelaide Monteiro disse...

Bien haias pulas tues palabras.
Percuro tener la Primabera ne l peito para cun eilha salir alegrie i felcidade a trasmitir als outros.
Tenemos que tornar l mundo mais quelorido, para cinzento yá bundou l que bibiemos na nuossa ninice.
Tamien l las bezes l´Eimbierno me bince la Primabera!...

Beisicos, Leonardo,

A.